3 Yóni

Ísu kwíyómpaꞋa irówana Yóni Ísuna kwayó-kwáásí kaumbo-kwááí aíyayaan-iyaꞋiyo. miráumai-ima maisuwéna maanáímbá agaimái moóráwai áwíꞋa Káyásimba ámakaiye.

3 John

1kemá Ísóigona kwaásiraꞋa kárákwiraundawai éꞋa maanáúváí agaimái amúne. Káyásiyo maanáúváí awánaao. Ísóigona árair-aimba ísaraundayaveꞋa sirumbá kwéamune. 2kesí kwaási ónaꞋa sirumbá kwéamune. Ísu Káráísitina aampaꞋá kaweꞋá umái kwégonda-aimba ísaraumne. miráumai kaweꞋá umái ménana íma áíꞋa íníntaveꞋa ÁánútumpaꞋa námúnaa kwésune. ená mayáí kaweꞋá kwéondayaveꞋa ÁánútumpaꞋa námúnaa kwésune. 3Ísóigona kwaási évakarawai enópakemba kesópaꞋa tésa entávésa tasésa enarumpimbá árair-aimba tátore máyaane sewaꞋá isáúnana kesirunkó kaweꞋá kwéiye. miráumai áraiꞋa arupí-ampaꞋa kwégwe máyaane. 4kesí iyámpói áraiꞋa arupí-ampaꞋa kwégowe-aimba iséꞋa aamoí kwéunda póna mináámóígómá évaka-tantaataveꞋo aamoimó únda-aamoigomba usáyaaitaraiye.

5kesí kwaásigompo Ísóigona kwaási enópaꞋa kuráamba túwaꞋnaa ema kaweꞋ-máyáí mairáanasa minkwáásívínkémbá óꞋom-bapaken-kwaasi enópaꞋa kuráamba miwígwáráꞋá túwaꞋnaa éma kaweꞋ-máyáí mairáane. 6miwí maankáꞋá Ísóigona kwaásiya tasimásimesa sésa emá arumbá tímakaandawai tasimásímakaawe. óꞋom-bapaꞋa Áánútuna mayáí komayánáe kwésewai emá aambó kónááon-tantaaꞋa kwétuwaꞋnaa-onda mindá kaweꞋá kwéone. 7miwímá Ísu Káráísitina mayáí maimaé kwénaaesa Ísu KáráísitimpaꞋo ímo tiráan-kwaasirakemba meéyámbá íma kwémayaawe. 8mindáyaveta Ísu KáráísitimpaꞋo tiráunda-kwaasiya miwíyá túwaꞋnaaya onó. miráumai tágárotamaiya máyaundaya pósa árair-aimba isánááowe.

9ákí-auvai agaimái tuwááwánana Ísóigona kwaásitopaꞋa kúwana moóráwai áwíꞋa Táyótevi kentávésa anóndakoman-iye sígwáe séna mináúváívínkén-áímbá iséna íma ísámai kaweꞋá uráimba póꞋa 10enópaꞋa kwéꞋa kwaási túrankaꞋa Táyótevi uráin-kwasai kosimátimenaumne. Táyótevi kentáá sáwíꞋa umásinkenaya kampar-áíntá simásínkaraiye. íma mináíné suꞋmainivo Ísóigona kwaási kwenópaꞋa kuráamba kwená naaúmpaꞋa íma mósá tínkaraiye. évakarawai kentí naaúmpaꞋa mósá tinkánáe suwaná íma mirán-oro séna monoꞋ-náúmpákémbá tiꞋmátukaiye.

11kesí kwaásiyo. sáwíꞋo ontembá íma mirá éma kaweꞋó ontembá mirán-uwo. kaweꞋó úmae iyówai Áánútuna kwaásiman-ovo sáwíꞋo úmae iyówai ÁánútumpaꞋa íma kwétewe.

12amáparawai Témítiyaantavesa kaweꞋnáꞋán-iye kwésewe. kwená mayáí awánésa sésa áraiꞋa kaweꞋ-máyáí kwémayaiye kwésewe. kesáágwáráꞋá miráyá kwésune. kwésunda-ainta árair-aimba ísaraawe.

13ayáátáár-aimba simámenaeꞋa maanáúváívímbá íma agayáúmpo 14sáwíyankaꞋa enópaꞋa kwéꞋa enaúrankaꞋa koméꞋa kosimámenaumne. paru umái máyaantaveꞋa ÁánútumpaꞋa námúnaa kwésune. ená kwaási kesé máyáawai sésa kaweꞋá umái ménaro kwésewe. kentáásí kwaási esé máyáantaveta séta kaweꞋá umái máéroya kwésumpo moórá-mora-kwaasi simátimiyo.

kemá Yóni kesáái ánásaiye.

15